नेपालगञ्ज,चाडपर्वलाई लक्षित गरेर सुरक्षा योजना सार्वजनिक गरेको जिल्ला प्रहरी कार्यालय बाँकेले आजदेखि मोटरसाइकल गस्ति सुरु गरेको छ ।
चाडपर्वमा चोरी, लुटपाट र झैझगडाका घटना बढी हुने भएकाले त्यसको नियन्त्रणका लागि मोटरसाइकल गस्ति अभियान सुरु गरिएको जिल्ला प्रहरी कार्यालय बाँकेका एसपी ओम बहादुर रानाले जानकारी दिनुभयो ।
उहाँका अनुसार, मोटरसाइकल गस्ति चौविसै घण्टा तयारी अवस्थामा रहने छ । जिल्ला प्रहरी कार्यालयका १४ र जिल्ला प्रहरी कार्यालय मातहत रहेका युनिटका १६ गरी ३० वटा मोटरसाइकलमा गस्ति गर्ने गरी मोटरसाइकल गस्ति सुरु गरिएको हो ।
उहाँका अनुसार, घटनास्थलमा तत्काल रेसपोन्स गर्न सहज होस् भनेर मोटरसाइकल गस्ति सुरु गरिएको हो । एसपीको आगमनसँगै बाँकेको शान्ति सुरक्षामा व्यापक सुधार भएको छ ।
