शुक्रबार बिहान इन्डोनेसियाको सुलावेसी द्वीपमा ६.२ म्याग्निच्युडको शक्तिशाली भूकम्प जाँदा भूकम्पमा परी कम्तीमा ४२ जनाको मृत्यु भएको अनुमान गरिएको छ । भूकम्पले त्यहाँका एक अस्पतालसहित अन्य थुप्रै भौतिक संरचना भत्किनुको साथै र थुप्रै मानवीय क्षति भएको अन्तर्राष्ट्रिय सञ्चारमाध्यमले बताइएको छ ।
भूकम्पमा सुलावेसी द्वीपका ६ सयभन्दा बढी मानिस घाइते भएको र १५ हजारभन्दा बढी विस्थापित भएको इन्डोनेसियाको राष्ट्रिय विपद् व्यवस्थापन बोर्डले जनाएको छ । सुलावेसी द्वीपको मामुजु सहरमा ३४ जना र त्यसैगरी मामुजु सहरबाट निकै टाढा रहेको दक्षिणी क्षेत्र माजेनेमा पनि भूकम्पको कारण ८ जनाको मृत्यु भएको छ । भत्किएका संरचनाहरुमा अझै व्यक्तिहरु पुरिएको हुनसक्ने अनुमान गरिएको छ ।
मामुजु अस्पतालको भग्नावशेषमा बिरामी र अपस्पतालका कर्मचारी सहित दसजनाभन्दा पुरिएको अनुमान छ । उद्धारकार्य अझै जारी रहेकाले भूकम्पका कारण भएको मानवीय क्षति र धनजनको क्षतिलगायतका विस्तृत विवरण आउन अझै बाँकी छ ।
