नेपाल बार एसोसिएसन,काभ्रेले तेमाल गाउँ पालिकाका जनप्रतिनिधिहरु लगायत न्यायिक समितिका पदाधिकारीहरु संग कानुनी साक्षात्कार कार्यक्रम सम्पन्न गरेको छ ।
उक्त साक्षात्कार कार्यक्रममा बोल्दै तेमाल गाउँ पालिकाका अध्यक्ष सलाम सिं तामाङले तेमाल गाउँ पालिकाका जनताको न्यायको लागि काभ्रे बारसंग सहकार्य गर्दै न्यायिक शिक्षा दिन आफू इच्छुक रहेको र तयार रहेको बताएका थिए । साथै वहाँले आफ्नो गाउँ पालिकामा रहेको न्यायिक समितिले सबै जनताको मन जित्न सफल रहेको पनि बताएका थिए ।
उक्त साक्षात्कार कार्यक्रममा उपाध्यक्ष दुर्गा माया तामाङले तेमाल गाउँ पालिकामा ६१ जना मेलमिलापकर्ता र ३ जनाको न्यायिक समितिले न्याय सम्पादनको काम उत्कृष्ट रूपमा गरेको बताएकी छिन् भने सामुदायिक विद्यालयहरुमा पनि कानुनी ज्ञान सम्बन्धी कार्यक्रम ल्याए अझ राम्रो हुने बताएकी छिन् ।
तेमाल गाउँ पालिकाका प्रमुख प्रशासकिय अधिकृत लक्ष्मण कुइकेलले विकास निर्माणको अभियानलाई सरल एवं सहज बनाउन गाउँसभाबाट अहिलेसम्म ऐन,नियमावली र कार्यबीधी ७ वटा निर्माण गरी विकासलाई अगाडि बढाएको बताएका छन् । उनले अझै थप कानुन बनाउनका लागि जिल्ला बारसंग सहकार्य गर्न चाहेको पनि बताए ।
काभ्रे बारका अध्यक्ष देवकुमार मोक्तानले स्थानीय तहले स्थानिय सरकार, सन्चालन ऐन २०७० अन्तरगत रहेर गाउँ पालिकाले न्याय सम्पादनको काम गर्नुपर्ने बताएका थिए । साथसाथै सुखी र समृद्ध नेपालको थालनी गाउँ-ठाउँ बाटै सुरू गर्नु पर्ने वहाँको जोड थियो ।
साक्षात्कार कार्यक्रममा काभ्रे बारका उपाध्यक्ष विजय भक्त श्रेष्ठ, सचिव मधुसुदन वाग्ले, तेमाल गाउँ पालिकाका प्रवक्ता तथा वडा नं ७ का अध्यक्ष ज्ञान बहादुर तामाङ ,वडा नं २ का अध्यक्ष तेमाल सिं तामाङ, जिल्ला बारका कोषाध्यक्ष रामप्रसाद मानन्धर र जिल्ला बारका सदस्य परमात्माराम पराजुलीको उपस्थिति रहेको थियो ।
