गीतकार संगीतकार मिना लामाको गीत “परदेशको पिडा (आमा)” सार्वजनिक भएको छ । राजधानीको चावहिलस्थित जुम वर्गर तामाङ फापरे जुहारी साँझ” मा बरिस्ठ संगीतकार तथा गायक चन्द्र कुमार दोङको प्रमुख आतिथ्यमा कार्यक्रम गरी गीत सार्वजनिक गरिएको हो । राजकुमार बानियाँको आवाजमा रहेको “परदेशको पिडा” गीतमा मिना लामा स्वयंको शब्द संगीत रहेको छ भने कृष्ण शताब्दीले यस गीतलाई संगीत संयोजन गरेका छन् । गीतको भिडियो मिना कृयसन युट्युब च्यानलमाफत हेर्न सकिन्छ ।
गीतमा वर्षेनि विदेशिएका नेपाली युवाहरूको कथा-व्यथा लाई प्रस्तुत गरिएको छ । देशको लथालिङ्ग राजनैतिक अवस्थाले सिर्जना गरेको आर्थिक समस्या र बेरोजगारीका कारण घर-परिवार, आफन्त र मुलुक छोड्नुपर्दाको बाध्यता र विवशतालाई गीतमा अत्यन्त मार्मिक र सुन्दर ढंगले प्रस्तुत गरिएको छ । घरपरिवारका अनेकौं आवश्यकता पुरा गर्न र साहुको ॠण तिर्न सुनौलो भविष्यको कल्पना गर्दै विदेशिएका युवाहरूले परदेशमा झेल्नुपरेको दुख पीडालाई गीतमा रोदनको रूपमा प्रस्तुत गरिएको छ । स्वदेशमा घरपरिवारले विदेशमा विकसित ठाउँमा सुख-सयलले बसेको, राम्रै कमाइ गरेको वाहिरी कुराहरुलाई मात्रै देख्छ । परदेशीको पिडा-रोदनलाई वास्तविक रूपमा आमाले मात्रै बुझ्ने कुरालाई यस गीतमा आमाको माया-ममता र महानतालाई उठान गरेको छ ।
यस गीतको भिडियोमा गौरी मल्ल, अमिर दोङ, सुधीर श्रेष्ठ, रमेश लामा, नविना ब्लोन, लोकेन लामा, विष्णु लामा र विशाल युद्धको अभिनय रहेको छ । गीतलाई अजय रेग्मीले छायांकन गरेका हुन् भने रमेश कुमाले भिडियो सम्पादन गरेका हुन् । गीतको भिडियोलाई शिव बिकले निर्देशन गरेका हुन् ।
