नेपालगन्ज , बाँकेको डुडुवा गाउँपालिकास्थित जयेन्दु वाल सुधार गृहमा रहेका बालकहरुको २ समूहबीच झड्प भई आगजनी र तोडफोड गरिएको छ । सिरक, डस्ना जलेको छ भने तोडफेड पनि भएको छ । बिहिवारराती २० जना बालकहरुलाई भक्तपूरस्थित बाल सुधार गृहमा लैजाने तयारी गरिएपछि स्थिती तनावपूर्ण भएको बालसुधार गृहका इन्चार्ज विमला काउचा मगरले बताउनुभयो । २० जना मध्ये १३ जना गाडीमा बसेपनि अन्य ७ जना असन्तुष्ट भएका थिए ।
बाँकेका प्रमुख जिल्ला अधिकारी विपिन आचार्यले बाल सुधार गृहको स्थिती अहिले सामान्य रहेको जानकारी दिनुभयो । बिहिवार अन्यत्र लैजान लागिएका २० जना नै १८ बर्ष उमेर भन्दा बढिका रहेका छन् । बाल सुधार गृहको क्षेत्रमा कार्यरत यूसेफ नेपालका निर्देशक केशव सुवाल सहितको टोलीले शुक्रबार विहान असन्तुष्ट बालकहरुसँग छलफल गरेको छ । घर पायक भन्दा टाढा लैजान लागिएको भन्दै असन्तुष्ट उनीहरुले राखेको मागमा छलफल चलिरहेको सुवालले बताउनुभयो ।
