नेपालगन्ज, नेपालगन्ज उद्योग वाणिज्य सङ्घको निर्वाचन सम्पन्न भएको करिब एक महिनापछि शुक्रबार प्रमाणपत्र वितरण तथा सपथग्रहण कार्यक्रम भएको छ । भदौं २ गते सङ्घको निर्वाचन अन्तर्गत मतदान भएकोमा भदौं ४ गते मत गणना सम्पन्न भएको हो । महासचिवका उम्मेदवारको विजयी घोषणामा असन्तुष्ट भई उच्च अदालत नेपालगञ्ज ईजलाशमा मुद्दा दर्ता भएपछि लामो समयसम्म सपथग्रहण रोकिएको हो । अदालतले महासचिव पदमा विजयी उम्मेदवारलाई सपथग्रहणमा रोक लगाएपछि शुक्रबार महासचिव बाहेक अध्यक्ष टंकप्रसाद धामी सहितका पदाधिकारी र सदस्यहरुको सपथग्रहण सम्पन्न भएको हो ।
बिवादका बीच आयोजित सपथग्रहणमा अध्यक्ष धामीले निर्वाचनको परिणाम आईसकेपछि अब सङ्घमा सबै पक्षलाई मिलाएर उद्योगी ब्यवसायीको हकहितमा प्रतिवद्ध भएर लाग्ने प्रतिवद्धता ब्यक्त गर्नुभयो ।
नव निर्वाचित अध्यक्ष धामीले भन्नुभयो, ‘सबै पक्षको सहमतिका आधारमा सङ्घ अघि बढ्नेछ, निर्वाचनको समयका प्यानल अब समाप्त भएका छन् , दुवै समुहको घोषणापत्र अनुसार अघि बढिनेछ ।’
महासङ्घका निवर्तमान अध्यक्ष अव्दुलवाहिद मन्सुरीले सबै पक्षलाई मिलाएर लैजान र सदस्य सम्मलाई उचित जिम्मेवारी दिएर नेतृत्वका विकास गर्न सुझाव दिनुभयो ।
पुर्व अध्यक्ष सुनीलकुमार शर्माले २०२४ सालमा स्थापित सङ्घको विवाद पहिलो पटक अदालत पुगेको भन्दै निर्वाचन आयुक्तको कमजोरी रहेको दावी गर्नुभयो । उहाँले अदालतलाई प्रभावित पार्नका लागि हतारमा सपथग्रहण गरिएको बताउनुभयो ।
सङ्घको निर्वाचनमा टंक धामी नेतृत्वको समावेशी प्यानल र ललितकुमार रौनियार नेतृत्वको साझा प्रजातान्त्रिक प्यानलबीच प्रतिष्पर्धा भएको थियो । अध्यक्षमा धामी
उपाध्यक्ष (उद्योग)मा चिरञ्जीवी ओली,उपाध्यक्ष (वाणिज्य) मा हरिलाल न्यौपाने,उपाध्यक्ष (महिला) मन्दिरा पाण्डे,उपमहासचिवमा टेकबहादुर खड्का, कोषाध्यक्षमा मख्खन धामी विजयी हुनुभएको छ । विजयी मध्ये खड्का र धामी मात्रै रौनियार प्यानलको रहनुभएको छ ।
सङ्घको १० सदस्यमा विष्णु श्रेष्ठ, डम्बर बहादुुुुर चन्द, शिवप्रसाद श्रेष्ठ, इन्दिराकुमारी शाही, टोपबहादुर थापा, सुदन के. सी., युवराज ढकाल, टीकामणि उपाध्याय, बुद्धिबहादुर वि.के. र सन्तोषकुमार पौडेल,एशोसियट सदस्यमा कमलकुमार कार्की र प्रदीपकुमार गुप्ता, सम्बद्ध सदस्यमा किशन गुरुङ, हिमनाथ पौडेल र विनय श्रेष्ठ विजयी हुनुभएको छ ।
महासचिवमा विवाद
निर्वाचन समितिले मतगणना गर्नेक्रममा अत्यन्त प्रतिष्पर्धा रहेको महासचिव पदको परिणाम घोषणामा विवाद भएको हो । निर्वाचन समितिले धामी नेतृत्वको प्यानलका उम्मेदवार भीमबहादुर रानाभाट ६ मतले विजयी भएको औपचारिक जानकारी सार्वजनिक गरेको थियो । रानाभाटले एक हजार ९२६ मत र उहाँका प्रतिद्वन्द्वी टंकप्रसाद शर्माले एक हजार ९२० मत ल्याएको निर्वाचन समितिको भनाई थियो । तर शर्मा पक्षले मतगणनामा क्रममा महासचिवको भन्दा अन्य मतपेटिकामा खसेको सम्पूर्ण मतपत्र गणना नभएका कारण अन्तिम परिणाम घोषणा नगर्न दबाब दिएको थियो । निर्वाचन समितिको घोषणापछि समितिका पदाधिकारीलाई तालाबन्दी गरि थुनिएकोमा अर्को दिन पुन मतगणना गर्ने सहमति भएको थियो । निर्वाचन आयुक्त टिकाजंग सिंहले पछि पुन मतगणना गराउन नमानेपछि यो विषय अदालतमा बिचाराधिन रहेको छ । सपथग्रहण कार्यक्रममा निर्वाचन आयुक्त सिंहले अदालतमा विचाराधिन विषयमा टिप्पणी गर्नुभएन । तर सङ्घको विधान अनुसार आफुले निर्णय गरेको दावी गर्नुभयो । उहाँले निर्वाचनमा विवाद हुनु सामान्य भएको दावी गर्नुभयो ।
