नेपालगन्ज, नेपालगन्जस्थित लाइफलाइन जनरल हस्पिटलले मिर्गौला पीडित बिरामी र नर्सहरुलाई लक्षित गरेर निशुल्क परामर्श तालिम सम्पन्न गरेको छ ।
डायलाइसिस गराइरहेका बिरामीलाई हस्पिटलले आफै बोलाएर निस्शुल्क परामर्श तालिम प्रदान गरेको अस्पताल प्रमुख डा.पारश श्रेष्ठले जानकारी दिनुभयो ।
परामर्श कार्यक्रममा डाइटिसियन कुबेर ले डायलाइसिस गराईरहेका बिरामीहरुको डाइट प्लान, के खाने के नखाने , खानाको मात्रा कस्तो हुनुपर्छ लगायतका विषयमा जानकारी गराउँनुभयो । उहाँले बिरामीहरुले आफुले अपनाउनुपर्ने सावधानी नअपनाउँदा समस्या हुने गरेको भन्दै अन्य समयमा जस्तै चाडपर्वमा समेत खानपान सन्तुलित गर्न बिरामीहरुलाई आग्रह गर्नुभयो ।
यस्तै कार्यक्रममा फिजिसियन डा. पारश श्रेष्ठले निमोनिया र फ्लू भ्याक्सिन लगायतका बारेमा जानकारी गराउँनुभयो । एक हिसावले यो बिरामीको लागि पढाइ नै हो भन्दा पनि हुन्छ, मिर्गौलाका बिरामीले लामो आयुको लागि आफैले अपनाउनु पर्ने सजगता, सावधानी, खानपिनका बारेमा पढाइएको छ उहाँले स्वास्थ्य पेजसंग भन्नुभयो केहि भ्रम र तथ्यहरुलाई हाम्रो पार्टबाट चिर्ने प्रयास गरेका छौ ।
कार्यक्रममा उपस्थित बिरामीहरुले चिकित्सकहरुसँग विभिन्न विषयमा जानकारी समेत लिएका थिए । बिरामीहरुका प्रश्न र जिज्ञासालाई डायटिसियन कुबेर र डा. श्रेष्ठले स्पष्ट पार्नुभएको थियो । अस्पतालले दशै तिहार लगत्तै बिरामीहरुलाई डाइट प्लान चार्ट समेत उपलब्ध गराउने जनाएको छ ।
नेपालगन्ज र कोहलपुर क्षेत्रका मिर्गौलाको डायलाइसिस गराइरहेका २५ बढी बिरामी तालिममा सहभागी थिए। कार्यक्रममा बिरामीसँगै भेरी अस्पतालका फिजिसियन डा.संकेत रिसाल, नर्स, सञ्चाकर्मी लगायतको उपस्थित थियो ।
कार्यक्रममा फिजिसियन डा.रिसालले भेरी अस्पतालको डायलाइसिस सेवाको इतिहास स्मरण गर्दै बिरामीहरुलाई आत्मबल बलियो बनाउन आग्रह गर्नुभयो । उहाँले चिकित्सकले भने बमोजिम खानपानलाई व्यवस्थित गर्न र स्वास्थ्यमैत्री जिवनशैली आत्मसाथ गर्न समेत बिरामीहरुलाई अनुरोध गर्नुभयो ।
पछिल्लो समय मिर्गौलाका बिरामी अस्वाभाविक रुपमा बढ्दै गएका छन् । बालबालिकादेखि युवा पुस्तासमेत मिर्गौला समस्यासंग जुधिरहेका छन् । अस्वस्थ खानपिन र बदलिँदो जीवनशैलीका कारण मिर्गौला समस्या भयावह बन्दै गएको छ ।
