नेपालगन्ज, नेपालगन्जको भेरि अस्पतालमा डायलासिस विभाग प्रमुख रहेका फिजिसियन डा. पारश श्रेष्ठले विकलांग अवस्थाकी महिलालाई व्हीलचेयर प्रदान गरेका छन् । मुगु घर भई हाल नेपालगन्ज बसपार्कमा बस्दै आएकी र गर्भवती अवस्थाकी धनु बमले भोगिरहेको समस्याबारे खबरगन्जले तयार पारेको भिडियो सामग्री हेरेपछि डा. श्रेष्ठले व्हीलचेयर प्रदान गरेका हुन् । डा. श्रेष्ठ आफै बम बसेको ठाउँमा पुगेर व्हीलचेयर हस्तान्तरण गरे ।
साथै उनले धनुको स्वास्थ्योपचारमा पनि सहयोग गर्ने प्रतिबद्धता जनाएका छन् । उनले भने, आँखा नदेख्ने श्रीमानले गर्भवती अवस्थाकी महिलालाई बिग्रेको व्हीलचेयरमा धकेलीरहेको देखेपछि मलाई आफूले सकेको सहयोग गर्नुपर्छ भन्ने लाग्यो . डा. श्रेष्ठले आफ्नो लाइफलाइन जनरल हस्पीटलमा थप चेकजाँच र उपचारमा सहायता प्रदान गर्ने प्रतिवद्धता जनाए ।
धनुका श्रीमान आँखा देख्दैनन भने धनु हिड्न सक्दिनन । आर्थिक अवस्था नाजुक भएका उनीहरू पेटको बच्चालाई सुरक्षित जन्माउनका लागि नेपालगन्जमा बहिनीको सहायतामा बसिरहेका छन् । खबरगन्जले उनीहरूबारे भिडियो प्रशारण गरेपछि समाजसेवी लिलबहादुर थापा लगायतले खाद्यान्न सहयोग गरेका छन् ।
