रौतहट ।अत्याधिक गर्मीको कारण रौतहटको जनजिवन प्रभावित हुन थाले पछि जिल्लामा रहेका नगरपालिकाहरुले सामुदायिक तथा संस्थागत विद्यालयहरु बन्द गराउन थालेका छन ।
रौतहटमा तापमान ४४ डिग्री सेल्सीयस सम्म पुगेपछि शिक्षा विकास तथा समन्वय इकाई रौतहटले जिल्लाका १८ वटै पालिकालाई गर्मी विदा दिन पत्राचार गरेको छ ।
उच्च तापमानका कारण विद्यालयमा विद्यार्थीहरु बेहोस हुने तथा लु लाग्ने समस्या आएपछि प्रमुख स्तरीय निर्णयबाट गौर नगरपालिका तथा कटहरीया नगरपालिकाले सबै सामुदायिक तथा संस्थागत विद्यालयहरुमा गर्मी बिदा दिएका छन ।
अत्याधिक गर्मीका कारण विद्यालयहरुको पठन पाठनमा समस्या देखिएकोले तत्कालका लागी २ दिन शुक्रवार सम्मका लागी वर्षे विदाबाट कट्टा हुने गरी विदा दिइएको गौर नगरपालिका मेयर शम्भू साहले बताए । “गर्मी तथा लु का कारण बालबालिकाको स्वास्थ्यमा प्रत्यक्ष असर पर्न सक्ने भएकोले विद्यालयहरुमा बिदा दिइएको हो ।” नगर प्रमुख साहले भने ।
अत्याधिक गर्मीका कारण सरकारी कार्यालयहरुमा पनि सेवाग्राहीको सँख्यामा निकै कमी आएको छ । सधै जसो भिडभाड हुने मालपोत कार्यालय तथा जिल्ला प्रशासन कार्यालयमा पनि सेवाग्राहीको उपस्थीति पातलिएको छ ।
बिहान सूर्योदय भएको केही घण्टा पश्चात नै तापक्रकम ३६ डिग्री हुने गरेको छ भने साँझ ६ बजे सम्म पनि सदरमुकाम गौरमा ४१ डिग्री सम्म तापक्रम रहने गरेको छ । गर्मीले गर्दा बजारहरुमा पनि मानिसहरुको चहलपहल प्राय बेलुका मात्रै हुन थालेको छ । बिहान सबेरै बाट शुरु हुने गर्मिले गर्दा खास गरी ज्याला मजदुरी र खेती किसानी गर्ने हरु अत्याधिक मारमा परेका छन ।
