काठमाडौं । नेपाल प्रिमियर लिग (एनपीएल) को अक्सनका लागि खेलाडीले आफ्नो नाम जुनसुकै ग्रेडमा पनि दर्ता गराउन पाउने भएका छन् । नेपाल क्रिकेट संघ (क्यान) ले असोज १२ सम्मको समय खेलाडी दर्ताका लागि खुला गरेको छ ।
खेलाडीले आफ्नो नाम ए, बी र सी ग्रेडमा दर्ता गराउन पाउनेछन् । सी ग्रेडका खेलाडीको न्यूनतम मूल्य २ लाख, बी को ५ लाख र ए को १५ लाख रुपैयाँ तोकिएको छ । सी ग्रेडका खेलाडीले उच्चतम ५ लाख, बी ग्रेडकाले १० लाख लिन पाउनेछन् । उच्चतम मूल्यमा पुगेपछि चिट्ठाबाट खेलाडी छनोट हुनेछन् ।
नेपाल क्रिकेट संघ (क्यान) का प्रवक्ता छुम्बी लामाले खेलाडीले आफ्नो विवेक अनुसार कुनैपनि ग्रेडमा नाम समावेश गर्न सक्ने बताए ।
‘खेलाडीले आफ्नो विवेक अनुसार ग्रेडमा नाम दर्ता गराउन सक्छन् । हामीले नेपालबाट यति खेलेको भन्ने राखेको छैनौं । हामीले ग्रेड निर्धारण गर्दा खेलाडी मर्कामा पर्नसक्छन् । नेपालबाट नखेले पनि घरेलुमा राम्रो गरेका ए र बी मा बिक्न सक्छन् । त्यसैले कुनै मापदण्ड राखिएको छैन’, उनले अनलाइनखबरसँग भने ।
सबै नाम आएपछि खेलाडीको सर्ट लिष्ट गरेर अक्सनमा जाने उनी बताउँछन् । क्यानले अक्सन दशैंअघि गर्ने जनाएपनि मिति भने तय गरेको छैन ।अघिल्लो हप्ता लक्की ड्र मार्फत मार्की खेलाडी छनोट गरिएको थियो ।
काठमाडौंमा करण केसी, पोखरा एभेन्जर्समा कुशल भुर्तेल, चितवनमा कुशल मल्ल, लुम्बिनीमा रोहित पौडेल, विराटनगरमा सन्दीप लामिछाने, जनकपुरमा आसिफ शेख, कर्णालीमा सोमपाल कामी र सुदूरपश्चिममा दीपेन्द्रसिंह ऐरी मार्की खेलाडी छनोट भएका थिए ।
एनपीएल नोभेम्बर ३० देखि डिसेम्बर २१ सम्म त्रिवि क्रिकेट मैदानमा हुनेछ ।
