एक्सन मुभी “सत्या” मंसिर १४ बाट हलमा आउने

काठमाडौं । पछिल्लो समय नेपाली चलचित्रहरु एक पछि अर्को हिट हुँदै गएपछि नयाँ नयाँ चलचित्रहरु पनि हलमा ल्याउने तयारी भईरहेको छ । केहि समय अगाडीनै निर्माण सम्पन्न भएर प्रदर्शनको तयारीमा रहेको लभस्टोरी एक्सन फिल्म “सत्या”ले एक कार्यक्रम बिच ट्रेलर सार्वजानिक गरेको छ ।
सिटी स्क्वायर मल, सामाखुशीस्थिति क्युएफएक्स सिनेमामा आयोजीत प्रेसमिटमा ट्रेलर सार्वजानिक गर्दै चलचित्र मंसिर १४ बाट देशै भरिका हलहरुमा लगाउने जानकारी गराइएको छ ।
चलचित्रमा बिकास थापा मगर, राज कालाखेती, प्रिया शर्मा, करणसिंह बोहरा, वर्षा थिङ, सुमन खत्री, तेजा ऐर, ममता पौडेललगायतका कलाकारले अभिनय गरेका छन् भने चलचित्रको प्रस्तुति बिकास थापामगर र निर्देशन मिलन आले मगरको रहेको छ ।
ट्रेलर सार्वजानिक कार्यक्रममा निर्देशक आलेमगरले ‘सत्या’ केही समयअघि निर्माण गरिएको भए पनि अहिलेको समयसान्दर्भीक रहेको बताए ।
करिब एक करोडको हाराहरी लगानीमा बनेको यो चलचित्रका प्रस्तुतकर्ता तथा अभिनेता बिकास थापामगरले चलचित्रका हिरोइन तथा केही निर्माता बिदेशमा रहेकाले प्रदर्शनमा अलि ढिला भएको बताउँदै ‘सत्या’ भरपुर मनोरञ्जक बनेको दावी गरे ।
यसै चलचित्रबाट अभिनयमा पाइला राखेका राज कालाखेतीले ‘सत्या’ बाट आफू निकै आशावादी रहेको बताए । उनले पछिल्लो समय एक्शन चलचित्र प्रति दर्शकको रुचि बढेकाले आफ्नो चलचित्र पनि दर्शकले मन पराउने बिश्वास ब्यक्त गरे ।
धनेश्वर फिल्मस् एण्ड एडभरटाइजिङको प्रस्तुत रहेका ‘सत्या’ को निर्मातामा सुमन खत्री र झुम्कादेवी कालाखेती छन् भने स्क्रिप्ट श्रवण सम्राटले लेखेका हुन सुमनकुमार तण्डुकारले खिचेको चलचित्रका गीतमा बिकास चौधरीको संगीत, रामजी लामीछाने, सुरेश पाण्डे र सुरेन बसेलको कोरियोग्राफी तथा तारा थापा ‘किम्भे’ को सम्पादन छ ।