नेपालगञ्ज, हत्या, अपहरण, बम विष्फोट लगायतका आधा दर्जनबढी अपराधमा संलग्न एक ब्यक्तिलाई प्रहरीले पक्राउ गरेको छ ।
नेपाल प्रहरीको सर्बाधिक खोजीको सूचीमा रहेर फरार रहेका बाँके डुडुवा गाउँपालिका साविक बनकट्टी ५ का धर्मा सिंह भन्ने राजेश यादवलाई मंगलबार विहान ३ बजे घरबाटै पक्राउ गरिएको हो ।
जिल्ला प्रहरी कार्यालय बाँकेले मंगलबार पत्रकार सम्मेलन गरि यादवलाई सार्वजनिक गरेको छ ।
जिल्ला प्रहरी कार्यालय बाँकेका एसपी ओमबहादुर रानाले भारतबाट घरमा आएको सूचनाको आधारमा यादवलाई तरबार, चक्कु सहित पक्राउ गरिएको जानकारी दिनुभयो ।
यादव विगतमा भूमिगत तराई जनतान्त्रिक मुक्ति मोर्चा(ज्वाला सिंह) समूहमा आद्ध रहेको प्रहरीले जनाएको छ ।
प्रहरीका अनुसार ९ वटा अपराधका घटनामा संलग्न देखिएका यादवलाई अदालतले कैद सजाय र जरिबानाको फैसला गरेको छ । यादव एक दशकदेखि अपराधीक गतिबिधिमा संलग्न भएको प्रहरीले जनाएको छ ।
