नेपालगन्ज, कोरोना भाइरसको संक्रमणबाट जोगाउन स्थानीय प्रशासनले मास्क लगाउन अनिवार्य गरेपछि सर्वसाधारणलाई सहजताका लागि नेपालगन्जमा समाजसेवी तथा व्यवसायीका एक नेताले ३ हजार मास्क वितरण गर्नु भएको छ ।
सो मास्क वितरण कसौधन वैश्य समाज बाँकेका अध्यक्ष तथा नेपालगन्ज उद्योग वाणिज्य संघका निवर्तमान अध्यक्ष नन्दलाल वैश्यले गर्नु भएको हो ।
मास्क नलगाएर घर बाहिर निस्कनेहरुलाई प्रहरीले पक्राउ गरेर सय रुपियाँ जरिवाना लिएर मात्र छाड्न थालेपछि सर्वसाधारणलाई मास्क लगाउन सहज होस भन्ने उदेश्यले एकै दिन ३ हजार मास्क वितरण गरिएको समाजसेवी तथा व्यवसायीका नेता वैश्यले बताउनु भयो ।
गत केही दिनदेखि मास्क नलगाउने धेरै सर्वसाधारण प्रहरीको कारवाहीमा पर्न थालेपछि सर्वसाधारणको सहजताका लागि नगरका विभिन्न स्थानमा गएर मास्क नलगाई बाटो हिड्नेहरुलाई ३ हजार मास्क वितरण गरिएको उहाँले बताउनु भयो ।
वैश्यले नगरको त्रिभुवन चोक, विपी चोक, धम्बोझी चोक र पुष्पलाल चोकमा मास्क वितरण गर्नुु भएको हो ।
प्रहरीले गत तीन दिनमा करिब ३ सय जनालाई जनही सय रुपियाँ जरिवाना असुल गरेपछि विपन्न तथा अन्य सर्वसाधारणलाई आवश्यक कामका लागि बजारमा हिडडुल गर्न सहज होस भन्ने उदेशयले मास्क वितरण गरिएको जनाईएको छ ।
गर्मीको बेला भएकोले सो अवसरमा गम्छा पनि वितरण गरिएको कसौधन वैश्य समाजले जनाएको छ । त्रिभुवनचोक पुर्वलाइनमा रहेका थोक कपडा विक्रेता नन्कुराम होलिरामले मास्क र गम्छा वितरणमा विशेष सहयोग गरेकोसमाजले जनाएको छ ।
बन्दाबन्दीलाई खुकुलो पारिएपछि बजारमा धेरै चहलपहल बढेको र स्थानीय प्रशासनले मास्क लगाएर तथा भौतिक दुरी कायम गरेर मात्र बजार जान आग्रह गरेपनि केहीले अझैपनि सो आग्रहलाई अटेरी गर्ने गरिएको पाईएको छ ।
