काठमाडौं । सरकारले कोरोना संक्रमित बिरामीको उपचारमा प्रभावकारी मानिएको रेम्डेसिभिर औषधि आयातको लागि अनुमति दिएको छ ।
औषधि व्यवस्था विभागले भारतका सिप्ला, माइलन र हिटेरो गरी तीन वटा कम्पनीबाट उत्पादन भएको रेम्डेसिभिर औषधि आयातको अनुमति दिएको हो ।
औषधि व्यवस्था विभागका महानिर्देशक नारायण ढकालले नेपाल स्वास्थ्य अनुसन्धान परिषद्को प्रोटोकल अनुसार प्रयोग र अनुसन्धान गर्न उक्त औषधि आयातका लागि अनुमित दिएको बताए ।
ढकालका अनुसार यो औषधि कोरोना संक्रमण भएर स्वास्थ्य अवस्था गम्भिर भएका बिरामी अर्थात आइसीयुमा कृतिम अक्सिजनको सहायता आवश्यक पर्ने बिरामीका लागि प्रयोग गरिने छ ।
उक्त औषधि सरकारले तोकेको कोभिड अस्पतालमा उपचारत बिरामीमा प्रयोग गरिने ढकालले बताए । उक्त औषधि प्रयोग गर्ने संक्रमित, औषधिको प्रभावकारिता र व्यवस्थापन तथा यसको असरबारे स्वास्थ्य अनुसन्धान परिषद्ले अनुसन्धान समेत गर्ने ढकालको भनाइ छ ।
उक्त औषधिको विभागले मुल्य आफै भने तोकेको छैन । विभागले औषधि ल्याउने कम्पनीले निर्धारण गरेको न्युनतम मूल्यमै ल्याउन लागिएको पनि बताए ।
