काठमाडौं । सरकारले मन्त्रिपरिषदबाट भदौ एक गते गरेका निर्णय सार्बजनिक गरेको छ । सरकारका प्रवक्ता युवराज खतिवडाले सोमबारको मन्त्रिपरिषद्का निर्णय मंगलबार सार्वजनिक गरेका हुन् ।
मन्त्रिपरिषदले बेल्जियम र युरोपियन युनियन, पाकिस्तान र जर्मनीका लागि तीन जना राजदूतको नियुक्ती गरेको प्रवक्ता खतिवडाले जानकारी दिएका छन् ।
सोमबार बसेको मन्त्रिपरिषद् बैठकले परराष्ट्र मन्त्रालयको प्रस्तावमा बेल्जियम र युरोपियन युनियनका लागि गहेन्द्रराज भण्डारी, पाकिस्तानका लागि तापस अधिकारी र जर्मनीका लागि रामकाजी खड्कालाई नियुक्त गरिएको हो ।
त्यस्तै सरकारले बाढीपहिरोमा परेर मृत्यु भएकाहरूको परिवारलाई सरकारले आर्थिक सहयोग उपलब्ध गराउने निर्णय गरेको छ।
सरकारले बाढीपहिरोमा परेर मृत्यु भएकाको परिवारलाई एक जनाको मृत्यु भएको भए दुई लाख र एकै परिवारमा एकभन्दा बढीको मृत्यु भए प्रतिव्यक्ति थप एक लाखका दरले राहत उपलब्ध गराउने निर्णय गरेको हो ।
त्यस्तै बाढीपहिरोमा परेका घाइतेको नि:शुल्क उपचार र मृत्यु भएकाहरूको परिवारलाई राहत दिने निर्णय भएको प्रवक्ता खतिवडाले जानकारी दिएका छन् ।
