विभिन्न सरकारी कामकाजका लागि घण्टौं लाइनमा बस्नुपर्ने झन्झटिलो अवस्थालाई मध्यनजर गर्दै हाल सरकारले आम सर्वसाधारणका लागि “नागरिक एप” सञ्चालनमा ल्याएको छ । अहिले मानिसहरुको व्यस्त जीवनशैली डिजिटल प्रविधितर्फ अग्रसर भइरहेको अवस्थामा सञ्चार तथा सूचना प्रविधि मन्त्रालयले आम सेवाग्राहीलाई डिजिटल माध्यम मार्फत छिटो छरितो र सहज ढंगले सेवा सुविधा प्रदान गर्न पत्रकार सम्मेलन गरी “नागरिक एप” सार्वजनिक गरे । सञ्चारमन्त्री पार्वत गुरुङका अनुसार अब सेवाग्राहीले “नागरिक एप” को प्रयोग गरी अनलाइन मार्फत विभिन्न सरकारी सेवाहरु लिन सकिने बताउनुभयो ।
‘लाइन हैन, अनलाइनबाट २४ सै घण्टा सरल, सहज र प्रभावकारी सरकारी सेवाका लागि नागरिक एप’ भन्ने नारासहित सञ्चालनमा आएको यस एपमा प्यान कार्ड आवेदन र प्यान नम्बर प्राप्त, सरकारी करको विवरण तथा जानकारी, नागरिकता, राहदानी, शैक्षिक प्रमाणपत्र र मतदाता परिचयपत्रको विवरणहरु अनि नागरिक लगानी कोष, सञ्चयकोष र सामाजिक सुरक्षा कोषको खातामा जम्मा भएका रकम विवरणहरुको समेत जानकारी पाउन सकिनेछ ।
एपमार्फत् हेलो सरकारमा गुनासो दर्ता पनि गर्न सकिने र सरकार तथा सार्वजनिक निकायले नागरिकका गुनासो सुनुवाई गरी सम्बोधन गरिएको पनि हेर्न सकिने छ । यो एपको प्रयोगबाट फेसलेस, पेपरलेस र समयको बचत हुने, सार्वजनिक विदाको दिन पनि सेवा लिन सकिने मन्त्रालयले जनाएको छ ।
“नागरिक एप” प्ले स्टोर र आइओए दुवै प्रयोगकर्ताका लागि उपलब्ध छ । हाल आफ्नै नाममा दर्ता भएको मोबाइल नम्बर नेपाल टेलिकम र एनसेलको सीममार्फत एपको प्रयोग गर्न सकिनेछ । सेवा प्राप्त गर्न सम्बन्धित व्यक्तिले आफनो नागरिकता, मतदाता वा राहदानीमध्ये कुनै एकको विवरण उल्लेख गर्नुपर्ने हुन्छ ।
हाल एपमा ९ वटा सेवा रहेको र अबको तीन महिनाभित्र सबै सरकारी सेवा यो एपमा उपलब्ध गराउने प्रक्रिया भैरहेको मन्त्रालयका सचिब हरिप्रसाद बस्यालले बताउनुभयो । यस “नागरिक एप” मा गृह मन्त्रालयसँगको दुई करोड १५ लाख नागरिकताको विवरण र त्यसैगरी निर्वाचन आयोगले संकलन गरेको एक करोड ५५ लाख बायोमेटि्रक र फोटोसहितको विवरण सञ्चित गरेर राखिएको छ । संघदेखि स्थानीय सरकारले उपलब्ध गराउने सार्वजनिक सेवालाई यही डिजिटल प्लेटर्फम मार्फत जोड्ने योजना रहेको र स्थानीय सरकारले दिने ६४ मध्ये ४० भन्दा बढी सेवा एपबाट पाउन सकिने मन्त्रालयले दावी गरिएको छ । आउँदो दिनमा मालपोत, भूमिसुधार, सवारी कर, चालक अनुमतिपत्र लगायत अन्य सेवाहरू थप्ने र हाल परीक्षणको रूपमा रहेको यश “नागरिक एप” बाट सरकारी सेवाहरु पारदर्शी, भरपर्दो र सुरक्षित हुने सरकारको दावी छ ।
