नेपालगञ्ज, नेपालगञ्ज उपमहानगरपालिका वडा नम्बर १८ का वडा अध्यक्ष दिपक वर्माले पहिलो कार्यकालमा सडक तथा भौतिक पूर्वाधार विकासलाई प्राथमिकता दिनुभएको थियो । दोश्रो कार्यकालमा भने वर्माले भौतिक पूर्वाधारसँगै शिक्षा, स्वास्थ्य र कृषिलाई पनि प्राथमिकता दिनुभएको छ । शैक्षिक सुधार र स्वास्थ्य सुधारमा अग्रसरता देखाएर बजेट विनियोजन गर्नुभएका वर्माले कृषितर्फ साना सिँचाईमा जोड दिनुभएको छ ।
साना सिँचाई अन्तर्गत विभिन्न गाउँटोलमा समरसेल, ट्युवेल गाड्ने काम भईरहेको छ । नमूनावस्ती र आसपासका टोलमा ३ वटा समरसेल जडान भई किसानले सिँचाई सुरु गरिसकेको अध्यक्ष वर्माले बताउनुभयो । यसैगरी भुजईगाउँ र कारकादौंमा पनि यसैगरी समरसेल जडान गरिने भएको छ ।
कारकादौंमा खेतीयोग्य जमिन घरबासमा बढि प्रयोग भईरहेकोमा साना सिँचाईका माध्यमबाट त्यसलाई रोकन सकिने वर्माको बिश्वास रहेको छ । वडा सदस्य दिग्विजय ढुंगानाले अहिले पनि जनताको पहिलो माग भौतिक पूर्वाधार विकास भएपनि वडा कार्यालयले भौतिकसँगै अन्य कामलाई पनि प्राथमिकता दिदै आएको बताउनुभयो ।
