नेपालगन्ज, नेपालगन्ज विमानस्थलबाट काठमाडौं प्रस्थान गर्न लागेका एकजना सरकारी कर्मचारीलाई प्रहरीले २६ लाख नगद रुपैयाँसहित पक्राउ गरेको छ ।
जिल्ला प्रहरी कार्यालय बाँकेका प्रहरी नायब उपरीक्षक नारायण डाङ्गीका अनुसार आन्तरिक राजश्व कार्यालय तुलसीपुर दाङमा कार्यरत राजश्व अधिकृत खगेन्द्र सापकोटालाई श्रोत नखुलेको नगद सहित पक्राउ गरिएको हो । सोमबार विहान काठमाडौं उडान गर्नेक्रममा विमानस्थलमा एक्सरे जाँचमा नगद बरामद भएको प्रहरीले जनाएको छ । सापकोटा बिहानको ८ः ४५ बजेको श्री एयरको उडानमा नेपालगन्जबाट काठमाडौं जाने तयारीमा थिए ।
चेकजाँचको क्रममा अधिकृत सापकोटासँगै रहेका अर्का अधिकृत दिपक पौडेल फरार भएको प्रहरीले जनाएको छ ।
पक्राउ परेका सापकोटालाई जिल्ला प्रहरी कार्यालय बाँकेमा राखिएको छ । घटनाबारे थप अनुसन्धान गरिरहेको प्रहरीले कारवाही र थप अनुसन्धानका लागि विभिन्न निकायसँग समन्वय गरिरहेको डिएसपी डाङ्गीले बताउनुभयो ।
