तामाङ समुदायका लोकप्रिय गायक बैरागी मोक्तानको तामाङ भाषाको मौलिक गीत अर्थात् डम्फूरे गीत “गाङ् कु स्योङ् कु” बोलको गीत युट्युबमा १२ लाख भन्दा बढी पटक हेरिएको छ । दर्शक श्रोताको राम्रो प्रतिक्रिया र माया पाएको उक्त गीत सार्वजनिक भएको एक वर्ष पुगेको शुभ अवसरमा राजधानी स्थित बौद्धमा ताम्बा संघ नेपालका अध्यक्ष पासाङ तामाङ ज्यूको प्रमुख आतिथ्यमा र चर्चित गायक रोज मोक्तान ज्यूको आतिथ्यमा एक कार्यक्रम सम्पन्न भयो ।
सो गीतमा शब्द दोर्जे मोक्तानको र संगीत बैरागी मोक्तानको रहेको छ भने स्वरमा बैरागी मोक्तानलाई गायिका इन्दिरा गोलेले साथ दिएका छन् ।
कार्यक्रमका क्रममा ताम्बा घेदुङका अध्यक्ष पासाङ तामाङले तामाङ कलाकारहरूले व्यवसायिक पाटो मात्रै नहेरी तामाङ मौलिक गीतको सृजना गर्नुपर्ने बताउनु भयो । त्यस्तै तामाङ गीत १२ लाख पटक युट्युबमा हेरिनु तामाङ समुदायको लागि खुशीको कुरा रहेको र सबै जना मिलेर ताम्बा गीतलाई प्रबर्द्धन गर्नुपर्ने कार्यक्रमका अतिथि गायक रोज मोक्तानले बताउनुभयो ।
गीतको म्युजिक भिडियोको निर्देशन दोर्जे मोक्तान, छायांकन हिरा बम्जन र सम्पादन गायक स्वयंले गरेका हुन् । दोलखा जिल्लाका रमणीय स्थलहरूमा छायांकन गरि प्रस्तुत गरिएको सो गीतमा प्रेमिका थिङ, दोर्जे मोक्तान, सागर स्याङ्तान, पान माया तामाङ,बसन्ती तामाङ, अभिषेक तामाङ र साङ्ढुब तामाङको अभिनय रहेको छ ।
बैरागी मोक्तानको डम्फुरे गीत” गाङ् कु स्योङ कु” ले इतिहास रच्यो
