नेपालगञ्ज, भारतको उत्तरप्रदेश राज्य सरकारद्वारा सञ्चालित उत्तरप्रदेश परिवहन निगमले भेरी यातायात प्रालीको सहकार्यमा नेपालगञ्जबाट भारतको राजधानी नयाँ दिल्ली र प्रदेश राजधानी लखनउमा सिधा बस सेवा सुरुवात गरेको छ ।
लुम्विनी प्रदेशसभा सदस्य रत्न खत्री, उत्तर प्रदेश परिवहन देवीपाटन क्षेत्र गोण्डाका प्रबन्धक अंकुर विकास र प्रालीका अध्यक्ष राजेन्द्र गिरीले संयुक्तरुपमा हरियो झण्डा देखाएर बस सेवाको सुभारम्भ गर्नुभयो । सो अवसरमा प्रदेश सांसद खत्रीले यात्रुको सहजता र कम शुल्कमा बस सेवा सुरु हुनु सकारात्मक भएको बताउनुभयो ।
भेरी यातायात प्रालीका अध्यक्ष राजेन्द्र गिरीले नेपालगञ्ज बसपार्कबाट प्रत्येक दिन विहान लखनउका लागि दुई र नयाँ दिल्लीका लागि दुई गरि चारवटा साधारण बस छुट्ने बताउनुभयो । भेरी प्रालीका सञ्चालक इन्द्र पुनका अनुसारा नयाँ दिल्ली सम्मको भारतीय रुपियाँ ८८७ र लखनउ सम्मको भारतीय रुपियाँ ३९० बस भाँडा तोकिएको छ ।
भारतीय पक्षले यात्रुहरुको सुविधालाई मध्यनजर गर्दै आगामी दिनमा बसको सङ्ख्या बढाउने र वातानुकुलित बस सेवा समेत सञ्चालन गर्ने जनाएको छ । निकट भविष्यमा प्रत्येक घण्टामा बसहरु सञ्चालन गर्ने तयारी भईरहेको प्रालीका सञ्चालक प्रमोद धितालले बताउनुभयो । प्रालीले पनि नयाँ दिल्ली र हरिद्वारमा वातानुकुलित बसहरु नेपालगञ्जबाट सञ्चालन गर्दै आएको प्रबन्ध निर्देशक उमेश गुरागाईले बताउनुभयो ।
